Skipulag og uppbygging

Skipulag og uppbygging Sameinuðu þjóðanna

Sameinuðu þjóðirnar voru stofnaðar 24. október 1945 af 51 ríki sem öll vildu viðhalda friði með því að efla alþjóðlegt samstarf og öryggi í heiminum. Nú eiga sem næst allar þjóðir heims aðild að þeim, eða alls 192**.

Þegar ríki gerast aðilar að Sameinuðu þjóðunum taka þau á sig vissar skuldbindingar samkvæmt stofnsáttmála Sþ, alþjóðlegum sáttmála þar sem settar eru fram grundvallarreglur í alþjóðlegum samskiptum. Tilgangur Sameinuðu þjóðanna er fjórþættur samkvæmt stofnsáttmálanum: að viðhalda friði og öryggi í heiminum; að stuðla að vinsamlegum samskiptum milli þjóða; að taka þátt í lausn alþjóðlegra vandamála og auka virðingu fyrir mannréttindum; og að vera samráðsvettvangur þjóða.

Sameinuðu þjóðirnar eru ekki yfirþjóðlegt vald og þær setja ekki lög. Þess í stað leggja þær lið við lausn alþjóðaátaka og við mótun stefnu í málum sem koma okkur öllum við. Öll aðildarríkin - hvort heldur þau eru stór eða smá, auðug eða snauð, án tillits til pólitískra skoðana eða þjóðfélagsgerðar - eiga sér rödd sem fær að heyrast þar sem þessi mál eru rædd og ákvarðanir teknar.

Aðalstofnanir Sameinuðu þjóðanna eru sex. Fimm þeirra - Allsherjarþingið, Öryggisráðið, Efnahags- og félagsmálaráðið, Gæsluverndarráðið og Skrifstofa aðalframkvæmdastjóra - eru til húsa í höfuðstöðvum Sameinuðu þjóðanna í New York. Sú sjötta, Alþjóðadómstóllinn, hefur aðsetur í Haag í Hollandi.

• Inni í þessari tölu eru Austur-Tímor (Tímor-Leste) og Sviss, sem fengu aðild í september 2002 og Svartfjallaland (Montenegro), sem fékk aðild í lok júní 2006.